චරිත සහතික

අයිස් පලමක් ගැනය මේ කව

පාලකයා සමග

කිසිවක් ම නොකරන

කිසිම පෙරමුණකට

මිනිසුන් නොකැඳවන

පේනව නේද නුඹට?

මේ කවිය අයිස් පලමක් ගැන

කඩය‍ට ගොඩ වැදී ඔබ සොයන

“ස්ට්‍රෝබෙරි එකයි... චොකලට් දෙකයි...”

මම නුඹට මොනවා කියන්න ද?

කිසිවෙක් මිය නොයනු ඇත

රස බලන දිව තුඩු  

ඉටි මෙන් දිය නොවනු ඇත

නොහඬන්න...

මේ කවිය අයිස් පලමක් ගැන

සෙවණැල්ල:  ඇන්ඩෘ මෝටන් - To whom it may concern

දරු ස‍හ බෙරය

පුංචි පුතු සීරුවෙන්

පුංචි බෙරයක් සමගින්

නැගෙයි

බෙර හඬක්

ඩං ඩං ඩං

නොවේ නම් රිද්මයක්

ලයක් හෝ තාලයක්

නිමයි

සියල්ලක්

ඩං ඩං ඩං

ඔහු වීය තනිවම

පෙර අන් සි‍යල්ලකටම

අදයි

උත්සවයත්

ඩං ඩං ඩං

පුංචි පුතු මුහුණින්

අසයි තම පද මැනවින්

නිහඬයි

අතර සැම පදයක්

ඩං... ඩං... ඩං...

නැගෙයි අත්පොළසන්

නිමයි බෙර හඬ දැන්

නොදැනෙයි

පුතුට මේ කිසිවක්

ඩං... ඩං... ඩං...

දෙනෙත් විවරව විශ්මයෙන්

පුතු බලයි සීරුවෙන්

නැගෙයි

පුතු හද හඬ

ලබ්... ඩබ්... ඩබ්...

සෙවණැල්ල: ජෝර්ජ් බෲස් - Responsibilities

වෙරළ අසබඩ නිවහන

සුසුදු පෙණ කැටි විසිරෙන

වෙරළ අසබඩ ශිලා නිවහන

නොතකමින්

ඉරි තැළුණු බව දේහය

අන් ගල් කුළු ලෙසම

නොසැළෙන

යහපත් මිනිසුන්ය එහි

නිවහන ලෙසම යහපත්

නිවහනද සුරකින

පිළිවෙලකි කදිමැති

සෑම දෙයකට ඒ තුළ

මනා ලෙස ගැලපී යන

අපි... දඩබ්බර කොලු රැළ

පමණකිය අපිළිවෙල

මෙකී පිළිවෙල තුළ

නිවහනින් පසුපස

කොළ පැහැ ගේ‍ට්ටුව

කදිම පිළිවෙල ගෙඋයන

විසිවී හැරෙන ලෙස

තල්ලුවෙන් පා පහරින්

කොළ පැහැ ගේට්ටුව

අතරින් පැන දුවමු අපි

වෙහෙසවී මා පිය සැදු

මනහර තෘණ පිටිය මත

තබන පාපන්දුව

ඉගිල යන වේගය

අපි... දඩබ්බර කොලු රැළ

වෙර යොදමු  පා වෙත

සුණු විසුණු වන තණ පත්

මහත් සතුටකි තරගය

උදා හිර සමගින

නැගී විත් දිය දුන්

කැපූ පිළිවෙලකට

තෘණ පිටිය මා පිය සතු

අපි... දඩබ්බර කොලු රැළ

පන්දුවට වන අරගල

විසුණු වන තණ බිම තුළ

බලා නිහඬව මා පිය

ජනේලය අසළම

දහඩියෙන් නෑවී

ගොඩ වදිමි යළි නිවසට

“මහන්සිය ඉවරයි!

නිමයි තණ පිටියම...”

පියාණන් කී මා  වෙත

අසා මා පිය හඬ

නෙතින් කඳුලැල් උපදින

සිනාසෙන ඔහු මුව

දැන් මා පිය දෙඋර මත

“කමක් නැහැ... මා පුත

නුඹ සතුටින්ය” කී ඔහු

සෙවණැල්ල: ජෝර්ජ් බෲස් - House with Back Garden

කවි සෙවණැල්ල

එ කවෙහි සෙවණැල්ල

මත මෙකව ලීවෙමි

එහෙත් සබඳිනි මේ කව

එ කවම නොවී ඇත

මේ තවත් කවියකි

එ කවෙහි සෙවණැල්ල

මත වන

උස් මුදුන් සම තැනි

එ කවෙහි ද විය මෙලෙසම

අඳුරු හැඩ තල සැකැසුම

අහා! කදිම‍ට ගැලපෙත

එහෙත් සබඳිනි මේ කව

එ කවම නොවී ඇත

මේ තවත් කවියකි

එ කවෙහි සෙවණැල්ල

මත වන 

- ප්‍රියන්ත ෆොන්සේකා